Könçığışta koronavirus haman tarala

Dön’yada koronavirus säbäple ğomere özelüçelärneñ sanı 608 meñ 987dän, yoqtıru oçraqları 14 million 647 meñnän arttı. Sawığuçılar – 8 million 737 meñ buldı.

Hindstanda Kovid-19dan ülüçelärneñ sanı 27 meñ 503kä, yoqtıru oçraqları 1 million 118 meñgä citte.

Ğıyraqta Kovid-19 arqasında soñğı täwlektä 90 keşe wafat buldı, 2 meñ 310 yaña yoqtıru oçrağı açıqlandı. Şulay itep, il külämendä ğomere özelüçelär 3 meñ 781, awırtuçılar – 92 meñ 530 buldı.

İran kizüdä 14 meñ 188 keşesen yuğalttı. İldä 273 meñ 788 keşegä koronavirus diagnozı quyıldı.

Rusiyädä Kovid-19 säbäple 12 meñ 342 ülem oçrağı terkälde. Räsmi sannarğa qarağanda, ildä 771 meñ 546 keşedä koronavirus açıqlandı.

Könbatış Afrika däwläte Nigeriyada kizü 778 keşene yaqtı dön’yadan alıp kitte, 36 meñnän artıq yoqtıru oçrağı terkälde. Awıruçılar arasında ilneñ tışqı êşlär ministrı Djeffri On’yeama da bar. “Tamağımdağı awırtu säbäple 4nçe tapqır Kovid-19 testı yasattım. Qızğanıçqa, bu yulı test näticäse pozitiv çıqtı. Tormış şundıy närsä. Qayçaq ciñäseñ, qayçaq yuğaltasıñ,”-dide ul.

Papua Yaña Gvineyada yaman şeş belän awıruçı 48 yäş’lek xatın-qız Kovid-19 säbäple ülde. Bu älege ildä koronavirustan ğomere özelgän berençe keşe bularaq terkälde.