Tramp çit il studentları belän bäyle qararınnan baş tarttı

AQŞ ilbaşı Donal’d Tramp idaräseneñ köz köne tulısınça onlayn belem biräçäk universitetlarda uquçı çit il studentlarına bäyle qararı ğamäldän çığarıldı. Anda älege studenrtlarnıñ yä tulı waqıtlı uqıtuçı başqa universitetlarğa küçüe, yäisä ildän kitüe küzallana ide. Älege qararğa qarşı xoquq köräşe başlanğannan soñ, Tramp idaräse çigenergä mäcbür buldı.

Yaña qararnı Garvard häm Massaçusets texnologiyä universitetı açqan däğ’wanı qarawçı Boston ölkä sud’yası Êllison Berrouz citkerde.  Ul kiçä başlanğan berençe utırışnıñ açılışında çığış yasadı häm AQŞ çik buyı häm tamğaxanä kontrole xezmäte qararınıñ ğamäldän çığarıluın äytte.

Älege idarä 6nçı iyül’dä belderü yasap, koronavirus kizüe säbäple tulısınça internet aşa belem birügä küçkän universitetlarda uquçı studentlarğa yaña viza birelmäyäçägen citkerde häm alarğa AQŞtan kitärgä quştı.

Tramp idaräseneñ bu qararı zur rizasızlıq uyattı. 17 ştat, başqala Vaşington häm 40tan artıq yuğarı belem yortı aña qarşı däğ’wa açtı.