Könçığışta koronavirus: qayber illärdä qabat karantin kertelä

Dön’yada koronavirus arqasında ğomere özelüçelär sanı 536 meñ 890nan, yoqtıru oçraqları 11 million 564 meñnän arttı. Sawığuçılar isä 6 million 538 meñne uzdı.

Paqıstan sälamätlek saqlaw ministrı Zafer Mirza Kovid-19 testınıñ pozitiv çığuın citkerde. Ul Twitter aşa belderü yasadı. Ministr äytüençä, virus bilgeläre ciñelçä uza. “Tabiblar kiñäşe belän üzemne öydä izolyaśiyälädem häm çaralar küräm,”-dide ul. Mirza Paqıstan xökümätendä koronavirus yoqtırğan dürtençe ministr.

Dön’yada iñ küp oçraq terkälgän öçençe däwlät Hindstanda soñğı täwlektä 425 keşeneñ ğomere özelde häm kizüdä ülüçelär sanı 19 meñ 693 buldı. Yoqtıru oçraqları ber köndä 24 meñ 248gä arttı häm tulayım 697 meñ 413 keşe täşkil itte.

Tön’yaq Kipr Törek cömhüriyätendä soñğı 24 säğat’tä yaña koronavirus oçrağı terkälmäde. İldä bügengä qadär Kovid-19 arqasında 4 keşeneñ ğomere özelde, 5 keşeneñ däwalanuı däwam itä.  

Ğıyraqta soñğı täwlektä koronavirus säbäple 105 ülem oçrağı buldı. Anda kizü başınnan birle 2 meñ 473 keşeneñ ğomere özelde. İldä 2 meñ 125 yaña yoqtıru oçrağı terkälgännän soñ bu awırunı êläkterüçelär sanı 50 meñ 479ğa citte.

Madagaskar başqalası Antananarivoda 32 keşeneñ ğomere özelde. Kovid-19 oçraqları artqannan soñ şähärdä qabat karantin çarası kerteläçäk. İldä yoqtıru oçraqları 2 atnada 2 tapqır diyärlek arttı häm 2 meñ 941gä citte.

Afrika qıytğasında virus säbäple ülüçelärneñ sanı soñğı täwlektä 279ğa arttı häm 11 meñ 359ğa citte. Tağın 13 meñ 620 keşedä koronavirus açıqlanğannan soñ älege çirne êläkterüçelär sanı 479 meñ 788 buldı.

Qıytğada bügengä qadär iñ küp ülem Misırda terkälde – 3 meñ 343 keşe. Kön’yaq Afrikada älege san – 3 meñ 199, Aljirda – 952.

Seyşel utrawları, Êritreya, Uganda, Namibiya häm Lesotoda älegä qadär ülem oçrağı turında xäbär itelmäde.

Kön’yaq Afrikada yoqtıru oçraqları 200 mengä yaqın, Misırda 75 meñ 253 awıruçı terkälde. Nigeriyada – 28 meñ 711.

Afrikada sawığuçılar sanı 230 meñnän arttı.