Koronavirus: qabat başın kütärä
Könbatış illärendä Kovid-19 kizüe belän bäyle soñğı räsmi sannar
Dön’ya külämendä koronavirustan ğomere özelüçelär sanı 506 meñnän arttı. Yoqtıru oçraqları 10 million 346 meñnän, sawığuçılar 5 million 611 meñnän kübräk.
Kizüneñ Awrupadağı üzäge Angliyada 43 meñ 550 keşe Kovid-19dan ülde. Başqala Londonnan yaqınça 160 çaqrım yıraqlıqta urnaşqan 400 meñ keşe yäşi torğan Lester şähärendä soñğı 2 atnada 866 oçraq terkälde. Sälamätlek saqlaw ministrı Mêtt Xênkok qalada bügennän başlap köndälek ixtiyac bulmağan kibetlärneñ, pänceşämbedän mäktäplärneñ yabılaçağın citkerde. Ul Lesterda yäşäwçelärne öydä torırğa, şähär êçe häm tışına säyäxät yasamasqa çaqırdı. “Sośial’ ara qağıydäseneñ ütälüen yaqınnan küzätep baraçaqbız häm, kiräk bulsa, tağın da nığraq çaralar kertäçäkbez,”-dide ministr.
İtaliyädä kizü säbäple soñğı köndä 6 ülem oçrağı terkälde. Bu 29nçı fevral’dän birle iñ keçkenä kürsätkeç. Kizüdä ğomere özelüçelär sanı 34 meñ 744kä citte. İldäge aktiv oçraqlar 185gä kimede häm 16 meñ 496 keşe täşkil itte. Sonğı täwlektä 174 yaña yoqtıru oçrağı terkälde. İldä kizüneñ märkäze sanaluçı Lombardiyä töbägendä virusnıñ taraluı däwam itä. 14nçe iyül’gä qadär açıq mäydannarda bitlek kiyü qabat mäcbüri xälgä kiterelde.
Franśiyädä soñğı 3 köndä 35 keşeneñ ğomere koronavirus arqasında özelde. Yuğaltular 29 meñ 813kä citte. Ütkän täwlektä tağın 280 keşeneñ virus yoqtıruı açıqlanğannan soñ ildä bu çirne êläkterüçelär sanı 200 meñ 611 buldı. Franśiyäneñ diñgez ar’yağındağı cirlärennän berse Gayanada kizüneñ taraluı borçu tudıruçı buluın belderdelär.
İspaniyädä sälamätlek saqlaw ministrlığı Kovid-19 kizüendä soñğı 1 atnada 3 keşeneñ ğomere özelüen, yuğaltularnıñ 28 meñ 346ğa citüen belderde. Sonğı täwlektä yoqtıru oçraqları 84kä arttı häm 248 meñ 970 keşe täşkil itte.
Portugaliyädä Kovid-19 arqasında soñğı täwlektä 4 keşeneñ ğomere özelgän. Kizü başınnan birle ildä 1568 keşe ülde. 266 yaña oçraq terkälgännän soñ koronavirus yoqtıruçılar sanı 41 meñ 912 buldı.
Balkannarda koronavirusnıñ köndälek kürsätkeçlärendä artu qayber illärdä beterelgän saqlanu çaraların qabat qullanılışqa kertterde.
Serbiyädä soñğı täwlektä tağın 4 keşeneñ Kovid-19 säbäple ğomere özelde. Ülüçelär sanı, şulay itep, 274 buldı. Aktiv awıru oçraqları isä 242gä arttı häm 1433 keşe täşkil itte. Başqala Belgradta barlıq yabulı mäydannarda bitlek tağu mäcbür xälgä kiterelde. Vran’ye şähärendä isä ğadättän tış xäl iğ’lan itelde.
Sloveniyädä Kovid-19dan 111 keşeneñ ğomere özelde, yoqtıru oçraqları 1585.
Xorvatiyädä kizü 107 keşene alıp kitte. Yoqtıruçılar 34kä arttı häm 2 meñ 725 keşe buldı.
Qaratawda Kovid-19 arqasında 9 keşe yaqtı dön’yadan kitte. Uzğan ayda kizüneñ betüen beldergännär ide. Ämma ul qabat başın kütärde. 17 yaña yoqtıru oçrağı terkälgännän soñ çirne êläkterüçelär sanı 500gä yaqınlaştı.
Bosniyä-Gerśegovina da soñğı täwlektä ülüçelär sanı 1gä arttı, 128 yaña oçraq terkälde. Şulay itep yoqtıruçılar sanı 1 meñgä yaqınlaştı. İlneñ İslam berlege räise Xösäyen Kavazoviç wäqalätle oyışmalarnı Serbiyädäge möselmannar küp yäşi torğan Sancak töbägenä yärdäm itärgä çaqırdı.
