Koronavirus: baylar tağın da bayıdı

Dön’ya külämendä koronavirus säbäple ğomere özelüçelärneñ sanı 505 meñgä yaqınlaştı. Yoqtıru oçraqları 10 million 273 meñ, sawığuçılar isä 5 million 574 meñnän kübräk.

Kizüneñ üzäge sanaluçı AQŞta tulayım 128 meñ 438 keşe ülde. Sälamätlek saqlaw ministrı Aleks Azar yoqtıru oçraqlarınıñ soñğı könnärdä qabat artu yağına kitüen citkerde. Ayıruça kön’yaq häm könbatış ştatlarda zur tizlek belän kübäyä. “İl xäzerge waqıtta berniçä ay êlek pandemiyä iñ yuğarığa mengän çordan üzgä xäldä. Vakśina häm däwalaw êşçänlege däwam itä, ämma kizüneñ taraluın äkrenäytä alğan waqıt ütte,”-dide ministr. AQŞta yoqtıruçılar sanı 2 million 637 meñnän artıq. Süz uñayınnan, ildä xalıq kizü arqasında iq’tisadi awırlıqlar kiçergän waqıtta bay keşelärneñ mal-mölkätläre tağın da zuraydı. Räsmi mäğ’lümatlar buyınça, AQŞta koronavirus başlanğannan birle 45 million keşe êşsezlek ğarizası yazğan.  Forbs sannarına qarağanda isä, 18nçe marttan 17nçe iyün’gä qadär 614 milliarder 584 milliard dollarğa bayıdı.

Kön’yaq Amerika däwläte Braziliyädä koronavirustan xäzergä qadär ülüçelär sanı 57 meñ 658 bularaq terkälde.

Angliyada kizüdä 43 meñ 550 keşeneñ ğomere özelde. İldäge yoqtıru oçraqları 311 meñ 151gä citte.

İtaliyädä kizü säbäple soñğı köndä tağın 22 keşeneñ ğomere özelde häm ülüçelär sanı 34 meñ 738gä citte. İldä aktiv oçraq sanı 155kä kimede häm 16 meñ 618 buldı. Sonğı täwlektä 174 yaña yoqtıruçı terkälde.

İspaniyädä sälamätlek saqlaw ministrlığı Kovid-19 arqasında soñğı 1 atnada 13 keşeneñ ğomere özelüen, ülüçelär sanınıñ 28 meñ 343kä citüen belderde. Yoqtıru oçraqları isä soñğı täwlektä 118gä arttı häm 248 meñ 770 keşe täşkil itte. Madrid avtonmiyäle xökümät başlığı İzabel Diaz Ayuso beldergänçä, kizü iñ nıq taralğan başqalada niçä aydan soñ täwge tapqır soñğı 24 säğat’tä Kovid-19 belän bäyle ülem terkälmäde.

Portugaliyädä ütkän täwlektä koronavirus säbäple 3 keşeneñ ğomere özelde. Kizüdä ülüçelär sanı 1564kä citte. 457 yaña yoqtıru oçrağı terkälgännän soñ ildä koronaviruslılar sanı 41 meñ 646 buldı.

Kovid-19 arqasında Avstraliyädä 104 keşeneñ ğomere özelde. Moña qadär kertelgän tıyularnı yomşatu turında uylağanda, Viktoriya töbägendä 75, il külämendä 85 keşeneñ virus yoqtıruı bilgele buldı. Viktoriya töbäge xökümäte räise Daniêl’ Êndryus, çit illärdän qaytuçılarnıñ 30%ınıñ karantinda totılğan qunaqxanälärendä Kovid-19 testı yasatudan baş tartuları açıqlanğannan soñ, 14 könlek karantin waqıtın tağın 10 köngä ozayttı.