Rusiyä NATOnı borçuğa saldı

NATO ğomum särqatibe Yens Stoltenberg Rusiyäneñ Urta diñgezdä, bigräk tä, Süriyä häm Liviyädä xäräkäten arttıruına borçıluın belderde. Ul ittifaqnıñ saqlanu ministrları cıyılışına qadär matbuğat oçraşuı oyıştırdı. Anda Stoltenberg Liviyädäge wäzğıyät’neñ äle haman qurqınıç buluın citkerde.

“Kümäk qaberleklär turındağı xisaplar bezne tirän borçuğa saldı häm BMOnıñ monı tikşerergä çaqıruına teläktäşlek belderäm,”-dide NATO başlığı.

Stoltenberg ittifaqnıñ Liviyädäge tınıçlıq öçen Berlin prośessı häm BMO citäkçelegendä alıp barıluçı kereşülärne yaqlawın da äytte. Bu temanıñ ul ministrlar belän oçraşuda da kütäreläçägen assızıqladı.

“NATO ber ük waqıtta Rusiyäneñ Süriyädä bulsın, Liviyädä bulsın – Urta diñgezdä xäräkäteneñ artuına borçıla. Wäzğıyät’ne yaqınnan küzätep barabız,”-dide Yens Stoltenberg.