AQŞta qulğa alınğan poliśiyä xezmätkärenä 40 yıl törmä yanıy
Djordj Floydnıñ ülemennän soñ başlanğan waqıyğalar däwam itä
AQŞ başqalası Vaşingtonnıñ mêrı Bowzer xärbilärne qaladan çığaru kiräklegen äytte. Alarnı afroamerikalı Djordj Floydnıñ poliśiyä zolımı näticäsendä ülüennän soñ oyıştırılğan rizasızlıq çaraları säbäple şähärgä kiterdelär.
Bowzer iminlek saqlaw oyışmalarınıñ citäkçeläre belän bergä matbuğat cıyılışı uzdırdı. Anda şähärdä soñğı 2 tönneñ tınıç uzuın äytte.
Mêr rizasızlıq çaralarına qarşılıq kürsätü öçen şähär tiräsenä urnaştırılğan xärbilär turında bolay dide: “Vaşingtonğa başqa ştatlardan kilgän berleklärneñ qaladan kitüen telibez”.
İlbaşı Donal’d Tramp başqalağa awır qorallanğan xärbilär häm iminlek köçlären çaqırtqannan soñ, biredäge rizasızlıq çaralarında dähşät bette, protestlar tınıç räweştä däwam itte.
Süz uñayınnan, Floydnıñ ülemenä säbäpçe bulu arqasında saq astına alınğan 4 poliśiyä xezmätkäreneñ 3se öçen 750 meñ dollar zalog bäyäse bilgelände. Bu kiçä mäxkämädä bilgele buldı. Qulğa alınğan poliśiyä xezmätkärläre To Tao, Tomas Leyn häm Aleksandr Kuêng sud’ya qarşına çıqtı. Kiläse utırış 29nçı iyün’dä bulaçaq.
Tao, Leyn, Kuêng häm Floydnıñ muyınına teze belän bastırıp ülemenä säbäpçe bulğan Derek Şoven waqıyğadan soñ 24 säğat’ ütkänçe êşlärennän çığarılıp, hönärdän çitläşterelde.
Şoven uzğan atnada Xennepin ölkä prokuraturası tarafınnan 3nçe däräcäle üterüdä ğayeplänep qulğa alındı. Ämma cinayät’ êşen Minnesota gıbernatorı ştatnıñ baş prokurorı Kit Êllisonğa tapşırdı häm şartlar tağın da awırlaştırıldı: Şoven 2nçe däräcä üterüdä ğayeplände. Bu kimendä 40 yıl törmä cäzası digän süz.
Minnesota ştatında 25nçe mayda bulğan waqıyğada, Djordj Floyd qulğa alınğanda sulış alıp bulmawın äytep yalvaruğa qaramastan, poliśiyä xezmätkäre teze belän muyınına bastıruın däwam itte häm ülemenä säbäpçe buldı. Şunnan birle AQŞ şähärlärendä, qaywaqıt cimerü häm talawğa äwerelüçe, rizasızlıq çaraları qaynıy.
