İndoneziya häm Filippinnar ğadäti tormışqa qayta

İndoneziya häm Filippinnar yaña tör koronavirus çikläwlären äkrenläp beterergä äzerlänä.  

İndoneziyanıñ iq’tisadi êşlär koordinaśiyäse ministrı Airlangga Hartarto beldergänçä, bigräk tä turizm, transport häm säwdä tarmağında ğadäti tormışqa qaytu prośessınıñ niçek bulaçağı mäs’äläsendä xäzerlek yasıylar. Ul şaxtaçılıq häm awıl xucalığı şikelle başqa sektorlar öçen dä êşçänlek alıp baruların äytte. Yañalıqlar tizdän cämäğat’çelekkä beldereläçäk.

İndoneziyanıñ din êşläre ministrı Faxrul Razı awıru oçraqları az bulğan cirleklärdä xökümätneñ mäçetlärne qabat ğıybadät öçen açuğa röxsät itü mömkinlegen citkerde.

Başqala Djakartada mäktäplärneñ yıllıq akademik kalendare buyınça 13nçe iyül’dä açıluı kötelä. Kizüneñ torışına qarap 5nçe iyün’dä säwdä üzäkläreneñ êşçänlegen başlawı planlaştırıla.  

Filippinnar däwlät başlığınıñ matbuğat särqatibe Garri Roke da belderü yasadı. Ul vedomstvoara êşçe törkemneñ 1nçe iyün’nän 12 million keşe yäşäwçe Metro Manila töbägendäge çaralarnı yomşartu öçen xökümätkä täq’dim kertüen äytte.  

Poke äytüençä, karantin waqıtında qağıydälärgä buysınu mäs’äläsendä ähämiyätle sabaq alındı häm xalıq yaña tärtiplärne kötä. Ul qayber cirleklärdä ğadäti tormışqa qaytu çorında da törle programma häm qağıydälärneñ däwam itäçäge turında kisätte.