Amerikada - azan tawışı

AQŞnıñ Minnesota ştatındağı Minneapolis şähärendä täwge tapqır reproduktordan azan yañğıradı. Bu şähär idaräse häm möselman cämäğat’çelege arasında uzğan söyläşülärneñ näticäse.

Minneapolisnıñ  Kedar-Riverzsayd rayonında pänceşämbe kiçennän başlap uramda azan tawışı işetelä başladı. Bu Ramazan ayı buyınça däwam itäçäk.

Minneapolista, AQŞnıñ başqa şähärlärendä şikelle ük, yaña tör koronavirus kizüenä qarşı qatğıy izolyaśiyä çaraları kürelä.

Azannıñ reproduktorlardan äytelüe Ramazan ayında koronavirus säbäple iftar häm säxär çaraları, tärawix häm başqa cıyınnarda qatnaşa almawçı möselmannarnıñ küñelen cılıtır dip ömetlänälär.    

Proyektnı şähärdäge möselmannar söyenep qarşıladı.