Könbatışta koronavirus: soñğı sannar

Koronavirustan kilep çıqqan ülemnär dön’ya külämendä 170 meñgä yaqınlaştı, yoqtıru oçraqları – 2 million 400 meñgä, terelüçelär isä 650 meñgä citte.

Kizüneñ märkäze xälenä kilgän AQŞta Kovid-19dan ğomere özelüçelärneñ sanı soñğı täwlektä 781gä arttı häm 41 meñ 356 keşe täşkil itte. Yoqtıru oçraqları 771 meñ 216. 71 meñ 497 keşe isä terelep çıqtı. İlbaşı Donal’d Tramp kizü säbäple AQŞqa migraśiyäne waqıtlıça tuqtatıp torunı küzallawçı qarar imzalayaçağın xäbär itte. N’yu-York gubernatorı Êndryu Kuomo Kovid-19 kizüe waqıtında êşlärgä mäcbür buluçılarğa, bigräk tä mediśina xezmätkärlärenä, 50% östämä tüläw yasaw öçen xäzerlek alıp baruların citkerde. İldä koronavirustan ülüçelärneñ azayuı kürenügä qayber zur şirkätlär citeşterüne qabat başlarğa qarar qıldı. Djordjiya ştatında kizügä qarşı çaralar qısalarında yabılğan qayber küñel açu urınnarınıñ comğa könne qabat açılaçağı belderelde.  

İtaliyada Kovid-19 säbäple ülüçelär sanı soñğı 24 säğat’tä 454kä artıp, 24 meñ 114 keşe täşkil itte. Yoqtıru oçraqları – 108 meñ 237. İldä iñ küp oçraq häm ülem terkälgän Lombardiya töbägennän yaxşı xäbär kilde. Milan şähäreneñ Niguarda xastaxanäsendä 5 reanimaśiyä urınınıñ bersenä dä ixtiyac qalmağan.

Franśiyädä Kovid-19 kizüe soñğı täwlektä 547 keşeneñ ğomeren alıp kitte. Ülüçelär sanı tulayım 20 meñ 265 buldı. Yoqtıru oçraqları – 120 meñ 67.

Angliyädä Kovid-19 säbäple ülüçelär sanı 16 meñ 509ğa citte. Ämma mäğ’lümatlar üz êçenä xastaxanädä ülüçelärneñ sanın ğına kertüe öçen çınlıqta niqadär keşeneñ ğomere özelüe bilgesez. Qartlar yortında êşläwçelär üzläre xezmät kürsätkän urınnarda ülemnärneñ 7 meñ 500gä citüen söyli.

Germaniyädä koronavirusqa bäyle 4 meñ 706 ülem oçrağı terkälde. Anda tağın 4 törekneñ ülüen xäbär itälär. İldä virus säbäple ğomere özelüçelärneñ sanı, şulay itep, 92gä citte. Germaniyädä yoqtıru oçraqları 146 meñ 653.

Kanadada koronavirustan ülüçelär sanı 1648.  Yoqtıru oçraqları 35 meñ 708gä citte. İl külämendä terelüçelärneñ sanı isä 12 meñ 197.

Yaña Zelandiyädä Kovid-19dan tağın ber keşeneñ ülüe belän ğomere özelüçelär sanı 13 buldı.

Kön’yaq Amerika däwläte Braziliyädä koronavirus kizüendä soñğı täwlektä 383 keşeneñ ğomere özelde. Ülüçelär sanı, şulay itep, 2 meñ 845kä citte, virus 40 meñ 581 keşedä terkälde.