"Qıtayda bez belmägän närsälär buldı"

Franśiyä ilbaşı Êmmanuêl’ Makron Qıtaynıñ yaña tör koronavirus kizüe belän köräşüe turında: “Döresen äytkändä, bez belmägän närsälär buldı,”-dide. Ul Angliyäneñ “Financial Times” gazetına birgän interv’yusında KOVİD-19 turında fikerlären belderde.

Makron kizü belän köräştä Franśiyä, Germaniya häm İtaliyaneñ Qıtay yäisä Rusiyä belän çağıştırıluınıñ mömkin bulmawın assızıqladı. “Qıtaynıñ koronavirus belän idarä itüdä bezdän tağın da yaxşı buluın söyläyäçäk qadär berqatlı bulmıyq. Belmibez. Anda bez belmägän närsälär buldı,”-di Franśiyä liderı.

Makron kizüdän iñ zur zarar kürgän Awrupa Berlege illärenä yärdäm kürsätelmäsä, İtaliya, İspaniya häm bälki Franśiyädä populistlarnıñ ciñü yawlayaçağın äytä.

“Awrupa Berlege säyäsi proyektmı yäisä iq’tisadi bazar mäydanımı – moña qarar birergä kiräkle çorğa cittek. Min säyäsi proyekt buluın uylıym. Tağın da alğa kitmäsäk, Yevro törkeme häm Awrupa fikereneñ cimerelü qurqınıçı bar,”-dip söyläde Êmmanuêl’ Makron.