Törmädä koronavirus fetnäse
Kolumbiyädä törmälärdä kizüdän saqlanu çaraları taläp itep çualışlar başlandı
Kolumbiyädä koronavirus säbäple törmädä fetnä çığa. Anda 23 mäxkümneñ ğomere özelä, 83e yaralana.
Cäzalarnı ütätü urınnarında totıluçılar Kovid-19ğa qarşı çaralar kürelüen taläp itep rizasızlıq belderä başlağan ide. Alar zurayıp bäreleşlärgä kiterde.
Kolumbiyä başqalası Bogotadağı La Modelo törmäsendä fetnä waqıtında yanğın başlana häm mäxkümnär forsattan faydalanıp qaçarğa mataşa. Bu xaqta ilneñ yustiśiyä ministrı Margarita Kabello Blanko belderü yasadı. Waqıyğada yaralanğan mäxkümnär xastaxanägä salınğan.
Ministr äytüençä, ildäge başqa törmälärdä dä qaçarğa mataşu häm fetnälär bulğan. Älege gıys’yannarda 7 xezmätkär yaralanğan. 2seneñ xäle awır buluın belderälär.
Blanko ber mäxkümneñ dä qaçuına yul quyılmawın citkerä.
“Qaçu planı kirtälände. Östäwenä, bu plan yäisä fetnäneñ kilep çığuına säbäp bulırlıq sälamätlek probleması yuq. Ber mäxkümgä dä koronavirus yoqmadı,”-dide ul.
Süz uñayınnan, Kolumbiyädä Kovid-19 kizüendä 2 keşe ülde. Sonğı mäğ’lümatlarğa qarağanda, 231 yoqtıru oçrağı bar.
