Könbatışta Kovid-19
İtaliyada virustan ülüçelӓr sanı 1809 buldı
Awrupada Kovid-19 virusı iñ küp kürelgӓn İtaliyada ülüçelӓr sanı 368gӓ artıp, 1809 buldı.
Virusnı yoqtırğan keşe sanı isӓ 24 meñ 747 buldı.
Prem’yer-ministr Djuzeppe Konte “Corriere della Sera” gazetına birgӓn interv’uda xӓtӓr virus arqasında risklı atnalarğa kerülӓren ӓytte.
Franśiyada yaña tör koronavirus kizüendӓ ülüçelӓr sanı 127gӓ citte. İldӓ virusnı 5 meñ 423 keşe yoqtırdı.
Virustan ülüçe sanı Germaniyada 13, awıru sanı 5 meñ tirӓse. Berlinda 50dӓn artıq qatnaşuçı bulğan barlıq çaralar tıyıldı.
Bavyera vilayӓtendӓ xӓtӓr virus kizüe arqasında ğadӓttӓn tış xӓl iğlan itelde.
Niderland mӓktӓplӓr hӓm balalar baqçalarınıñ 6 aprel’ könenӓ qadӓr yabıluın citkerde. İldӓ Kovid-19dan 20 keşe ülde, meñnӓn artıq keşe virusnı yoqtırdı.
14 keşeneñ ğomere özelgӓn Şveyśariyada xasta sanı 2 meñnӓn arttı.
Amerika Quşma Ştatlarında qurqınıç virus 65 keşeneñ canın aldı, 3500 keşe awırıy.
Kizü Amerikan xalqı arasında panika tudırdı, supermarketlarğa höcümnӓr küzӓtelde.
Gvatemalada Kovid-19 arqasında 85 yӓşendӓge ber xasta ülde.
Venesuêlada 17 keşedӓ virus kürelde, kizü belӓn körӓş qısalarında başqala Karakas belӓn 6 vilayӓt’tӓ karantin iğlan itelde.
Kolumbiyada virus 34 keşegӓ yoqqan. İldӓge barlıq belem birü oyışmaları yabıldı.
2 keşe ülgӓn Êkvadorda 37 keşedӓ virus kürelde.
Boliviyada isӓ 11 keşe virusnı yoqtırğan. 18 marttan başlap Awrupa Berlege belӓn Angliya, İrlandiya hӓm İrannan kitüçelӓrgӓ qapqalar yabılaçaq.
Awstraliyada virustan 5 keşeneñ ğomere özelde, awıru sanı – 313. 14 könlek karantinnı bozuçılarğa aqçalata hӓm törmӓ cӓzası birelӓçӓk.
Kovid-19 arqasında İspaniyada 292 hӓm Angliyada 35 keşe wafat buldı.
Çexiya hӓm Peruda isӓ xӓtӓr virus arqasında ğadӓttӓn tış xӓl iğlan itelde.