Könçığış illärendä koronavirus

İranda başqala Tähran häm koronavirus oçraqları terkälgän 23 töbäktä mäçetlärdä comğa namazı qılınmayaçağı belderelde. Bu ilneñ yartısınnan kübräge, anda barlığı 31 töbäk bar.

İrannıñ 4 xalıq ışanıçlısında Kovid-19 raslandı. Baştaraq ul parlamenttağı 2 deputatta kürelgän ide. Şunnan soñ 30 xalıq ışanıçlısınnan analizlar alalar, 4sendä çir raslana. 

İran külämendä Kovid-19dan ülüçelär 26ğa, yoqtıru oçraqları 245kä citte.

Qıtaydan soñ koronavirus oçraqları iñ küp bulğan illärdän berse - Kön’yaq Koreyada kizü zur tizlek belän tarala. Ber täwlektä 505 yaña awıru oçrağı terkälde. Xäzer ildä viruslı keşelär sanı 2 meñnän arttı. Ülüçelär - 13.

Yaponiyägä kilgändä, xökümät räise Şinzo Abe koronavirusnıñ taraluın çikläw öçen düşämbedän başlap mäktäplärdä 1 ayğa uqular tuqtatılaçağın citkerde. Anda kizüdän 8 keşeneñ ğomere özelde.  

Koronavirus yoqtıruçılar sanı Ğıyraqta - 7, Livanda - 3 buldı.