Awrupada pıçaqlı höcümnär

Angliyäneñ başqalası Londonda terrorçı höcüme oyıştırğan ber keşe poliśiyä tarafınnan atıp üterelde. Waqıyğa Stritxem töbägendä kiçä cirle waqıt belän säğat’ köndezge 2 tiräsendä bula. Ber keşe pıçaqlı höcüm yasıy häm 2 keşene yaralıy.

Poliśiyädän belderülärençä, höcümçene üle kileş qulğa töşerälär. Anıñ gäwdäsenä bomba yäisä şuña oxşatıp êşlängän cihaz berketelgän bula.     

2019nçı yılnıñ 29nçe noyabrendä dä Londonnıñ üzägendä oxşaş waqıyğa bulğan ide. Ul waqıtta pıçaqlı höcümdä 2 keşeneñ ğomere özelde. Poliśiyä ğayeplene atıp üterde.  

Bel’giyäneñ Gent şähärendä dä ber xatın-qız, pıçaqlı höcüm yasağannan soñ, poliśiyä aña ut açtı. Cirle matbuğat çaraları yazğança, höcümçe 2 keşegä pıçaq belän yaralağan. Alarnıñ tormışına qurqınıç yanamıy. Höcümçene dä yaralı kileş qulğa alalar. Anıñ bu ğamäleneñ säbäpläre älegä belderelmi.

İlneñ başqalası Brüssel’dä isä Şuman mäydanındağı Awrupa Berlege komissiyäse binası qarşındağı divar yanına quyıp qaldırılğan sumka poliśiyäne ayaqqa bastırdı. Alar ul tirädän keşelärne çitläşterde, qurqınıçsızlıq çaraları kürde. Maxsus öyrätelgän êt sumkanı isnägännän soñ, anı açıp qaradılar. Êçe buş bulıp çıqtı.