İskä alu rizasızlıq çarasına äwerelde

İrannıñ başqalası Tähranda kilep töşkän Ukraina oçqıçında hälaq buluçılarnı iskä alu çarası rejimğa qarşı demonstraśiyägä äwerelde. Anı ilneñ hawa saqlanu sisteması bärep töşerüe belderelgännän soñ rizasızlıq üste.

Tährannıñ berniçä universitetında hälaq buluçılarnı şämnär quyıp iskä aldılar. Şunda rejimğa qarşı şiğar’lär äytelde.

Sośial’ mediada çıqqan videolarğa qarağanda, Şärif universitetınıñ qarşında cıyıluçılar “Söläymani üterüçe, aña yul kürsätüçe (Xamaney) nadan” dip qıçqırdı. Oçqıç hälakätendä älege uqu yortınnan 14 student ülde.  

Tähran universitetında isä noyabr’ ayında benzinğa bäyälär artuğa qarşı rizasızlıq çaralarında ğomere özelgän 1500 keşene dä iskä aldılar häm “diktatorğa ülem” şiğar’läre qıçqırdılar.

Märşädtäge Firdäwsi universitetında da hälaq buluçılarnı iskä alu çarası oyıştırıldı.  

İsfaxannıñ tarixi Siosepol’ küperendä cıyıluçılar “Xalıq telänä, ağa (Xamaney) äfändelänä”, “Xamaney - üterüçe, idaräse isä xorafatçıl” şikelle şiğar’lär äytelde.

Başqa şähärlärdä dä iskä alu çaralarında xökümätkä qarşı söylämnär buldı.

Şul uq waqıtta, İran däwlät telekanalı alıp baruçısı Zehra Xatemirad başqa êşli almayaçağın belderep wazıyfasınnan kitüen äytte.