Trampnıñ başı öçen 80 million dollar

Üterelgän iranlı general Qasıym Söläymaninıñ Mäşxäd şähärendäge cenaza cıyınında iseme bilgele bulmağan beräw AQŞ ilbaşı Donal’d Trampnıñ başı öçen 80 million dollar bilgelänüen äytte.

Al Arabiyanıñ xäbärendä äytelgänçä, älege şäxesneñ belderüe İran däwlät telekanalında da çıqqan. Ul xalıqqa möräcäğat’ itep İranda 80 million keşe yäşäwen belderä häm härber iranlını 1 dollar birergä çaqıra.  

“Häm bu 80 million dollarnı üz isemebezdän inqıylabıbıznıñ böyek şäxesen (Söläymani) üterergä ämer birgän keşeneñ (Tramp) başın kiterüçelärgä büläk bularaq biräçäkbez. Bezgä bu sarı çäçle divananıñ başın kiterüçegä böyek İran däwläte isemennän 80 million dollar biräçäkbez.”-dip söyli älege bilgesez beräw.

İsegezgä töşeräbez, İrannın Qudüs köçe komandirı general Qasıym Söläymani häm anıñ yanındağı 9 keşe 3nçe ğıynvarda Ğıyraqnıñ başqalası Bağdadta AQŞ tarafınnan oyıştırılğan hawa höcümendä üterelde.