Avstraliyädä yanğın: 18 keşe ülde

Avstraliyädä sentyabr’ ayınnan birle tuqtamawçı urman yanğınında ülüçelärneñ sanı 18gä citte. Ut qaywaqıt toraq punktlarğa da çäçri. Bu atnada yanğın kontrol’gä alınmağan Yaña Kön’yaq Uêl’s häm Viktoriyä töbägendä tağın 17 keşe yuğaldı.

Ut törle noqtalarda 5 million gektar tirtäse mäydannı yuq itte. İke töbäktä 1200dän artıq yort kölgä äylände.  

Wäqalätlelär bu atnada Viktoriyädä - 68, Yaña Kön’yaq Uêl’sta 381 öyneñ yanuın belderde. İke töbäktä dä yanğın yaqınça 200 noqtada täêsirle. Meñnärçä keşe ilneñ könçığış yarların taşlap kitä başladı.

Viktoriyä töbägendä 4 meñläp keşe plyajlar, port häm köymälärgä sıyındı. Yar buyı şähärçege Mallakotada yaqınça 500 keşene xärbi köymä belän êvakuaśiyälädelär.

Viktoriyä xökümäte räise Daniêl’ Êndryus: “Mallakotada yaqınça 3 meñ turist häm cirle xalıqtan 1 meñ keşe buluın uylıybız. Bolarnıñ barısı annan kitärgä telämäs, barısın ber’yulı köymägä alıp bulmıy,”-dide.

Avstraliyä xökümäte räise Skott Morrison aylar buyı däwam itüçe yanğınnı yanğırlar başlanğançı sünderep bulmayacağın farazladı.