Rusiyädä "çit il agentları"
Matbuğat çaraların da çit il agentı bularaq xökem itärgä yul açuçı qanun ğamälgä kerä
Rusiyädä “çit il agentı” qanunın bozuçılarğa törmä häm ştraf qarala. Däwlät başlığı Vladimir Putin şul xaqtağı dokumentnı imzaladı. Anda äytelgänçä, internetta yäisä başqa ber tirälektä mäğ’lümat cäyeldergän häm çittän finanslanğan şäxes häm oyışmalarnıñ “çit il agentı” bularaq bilgelänüen küzdä totuçı qararnıñ bozıluı öçen cawaplılıq kertelä.
Qanunnan taypıluçı keşelärgä 10 meñnän 100 meñ sumğa qadär ştraf yäisä 15 kön törmä cäzası bilgelänä. Oyışmalarğa isä 500 meñnän 5 million sumğa qadär ştraf qaralğan.
Qanun 2020nçe yılnıñ 1nçe fevralennän ğamälgä keräçäk.
Putin Rusiyädä êşläwçe häm çit ildän finanslanuçı matbuğat çaralarınıñ “çit il agentı” bularaq bilgelänüen küzdä totuçı qanunğa üzgäreşlärne 2017nçe yılda raslağan ide. Şunnan soñ, Rusiyä yustiśiyä ministrlığı 9 AQŞ oyışmasın “çit il agentı” qanunı qısalarına kertte. Aralarında “Amerika awazı” (Voice Of Amerika) radiosı da bar.
Ay başında isä Putin ildä internet yäisä başqa ber tirälektä mäğ’lümat cäyelderüçe häm çit ildän finanslanuçı keşelärne dä “çit il agentı” bularaq bilgeläwçe qanun üzgäreşlären imzaladı.
