Normandiya oçraşuı uzdı

Ukraina krizisına çişeleş tabu öçen oyıştırılğan Normandiya Liderlar oçraşuınnan soň ilneň könçığışında utnı tuqtatunıň urnaştırıluı mäs’äläsendä qarar qabul itelde.

Germaniya, Franṡiya, Rusiyä häm Ukraina liderları başlatqan häm Normandiya formatı dip ataluçı söyläşülär 3 yıldan soň qabat ütkärelde.

Franṡiyadäge Yelisey sarayında uzğan 4 yaqlı oçraşudan alda Rusiyä däwlät başlığı Vladimir Putin häm Ukraina ilbaşı Vladimir Zelenskiy Germaniya Kanṡlerı Angela Merkel’ häm Franṡiya däwlät başlığı Êmmanuêl’ Makron belän ike yaqlı söyläşülär ütkärde.

Liderlar oçraşuınnan soň Putin, Makron, Merkel’ häm Zelenskiy matbuğat oçraşuı oyıştırdı.

Ayıruça oçraşudan soň “Bäreleş töbägendä totrıqlılıq urnaştıru öçen aşığıç çaralar”, Minsk kileşüläreneň säyäsi xökemnäreneň ğamälgä kerüenä qarağan çaralar” häm “Monnan soňğı adımnar” räweşendä 3 başçadan toruçı urtaq belderge açıqlandı.

Ukraina däwlät başlığı oçraşuda yıl azağına qadär ilneň könçığışında utnı tuqtatunıň urnaştırıluı mäs’äläsendä kileşülären belderep: “Bügen Ukraina, Germaniya, Franṡiya häm Rusiyä iminlek urnaştıru öçen aşığıç çaralar kürü mäs’äläsendä qarar qabul itte,”- dide.

Kiyev citäkçelegeneň ilneň federal’läşüenä qarata Töp qanunda üzgäreşkä röxsät birmäyäçägen äytkän Zelenskiy Rusiyä belän fiker ayırmalıqlarınıň däwam itüen açıqladı.

Ukrainanıň federal’läşü mäs’äläsen qabul itmäyäçägen assızıqlağan Zelenskiy unitar däwlät qorılışınnan waz kiçmäyäçäklären belderde.

Ukrainanıň könçığışı krizisınıň çişeleşe mäs’äläsendä qullarınnan kilgänne başqaraçaqların äytkän Putin tübändägeçä däwam itte: “Taraflarnıň dialog qorıp, ber-berse belän kileşüläre kiräk. Dialogsız bernindi mäs’älä çişelmäs.”