Ğıyraqtağı çaralarda 254 keşe ülde

Ğıyraqta 1nçe oktyabr’dä başlanğan xökümätkä qarşı rizasızlıq çaralarında xäzergä qadär 254 keşeneñ ğomere özelde.

BMOnıñ Ğıyraq missiyäse tarafınnan basılğan xisapta yazılğança, ilneñ başqalası Bağdad häm töbäklärendä däwam itüçe protest çaralarının ikençe dulqınında 97 keşe ülgän. Monnan tış, mennärçä keşe yaralanğan. 25nçe oktyabr’dän qabat yalqınlanıp kitkän demonstraśiyälärdä qatnaşuçılarnıñ bik küp xoquqların bozu oçraqları küzätelgän. Xisapta yazılğança, iminlek köçläre atqan gaz bombası 16 keşeneñ ülemenä säbäpçe bulğan.

Dokumentta BMOnıñ Ğıyraq keşe xoquqları ofisı wäkile Daniêl’ Bellnıñ fikerlärenä urın birelä. “İminlek köçläreneñ qoralsız xalıqqa gaz bombası atuına bernindi aqlaw bula almas,”-di ul.

Süz uñayınnan, Ğıyraqnıñ kön’yağındağı Zikar töbägendä rizasızlar berniçä xalıq ışanıçlısınıñ öyenä ut törtkän. Anda ülem-kitem bulmawın belderälär.