Ğıyraqta ülüçelär

Ğıyraqta 1nçe oktyabr’dän birle baruçı xökümätkä qarşı çaralarda 104 keşe ülde, 6 meñnän artığı yaralandı. Bu xaqta ilneñ êçke êşlär ministrlığı süzçese Saad Maan belderde. Anıñ äytüençä, ülüçelär arasında grajdanlılar da, iminlek xezmätkärläre dä bar.  

Maan çaralar waqıtında 51 däwlät häm şäxsi oyışmağa ut törtelüen, 8 partiyä binasınıñ häm 2 poliśiyä kontrol’ noqtasınıñ da yanuın söyläde.

Ğıyraq idaräse rizasızlar yağınnan da, tärtip saqçılarınnan da köç qullanuçılarnı soraw aluğa tartu kiräklegen belderde. Bu xaqta ilbaşı Bärxäm Salixnıñ parlament räise Möxämmät äl-Xalbusi häm Yuğarı mäxkämä şurası citäkçese Faik Zidan belän oçraşuında söyläştelär. Anda şulay uq, kemlege bilgesez keşelär tarafınnan telekanallarğa oyıştırılğan höcümnärneñ dä tikşerelüe kiräklege assızıqlandı.