İran ilbaşı AQŞqa yul aldı

İran ilbaşı Xäsän Ruxani Farsı qultığınıñ iminlege belän bäyle “Gürmüz solıx iniśiativası” isemle plannı iğ’lan itäçäklären häm barlıq illärne aña quşılırğa çaqıraçaqların belderde. Ul BMOnıñ 74nçe ğomum şurası utırışlarında qatnaşu öçen AQŞnıñ N’yu-York şähärenä oçar aldınnan Tähran aêroportında jurnalistlar belän oçraştı. Ruxani beldergänçä, plannı ul cıyılış barışında täq’dim itäçäk. Älege dokumentnıñ töp maqsatı - Farsı qultığında kümäk xezmättäşlek häm iminlek. Anda iq’tisad häm başqa mäs’älälär dä kergän.

“İğ’lan iteläçäk plannıñ iseme “Gürmüz solıx iniśiativası”. Regionnıñ iminlegen täêmin itü öçen Farsı qultığı häm Gürmüz buğazı tiräsendäge barlıq däwlätlärne quşılırğa çaqıram. Älegä açıqlanmağan öçen reakśiyä niçek bulacağı bilgele tügel,”-dide ul.  

Ruxani çittän kilüçelärneñ berqayçan da töbäkkä iminlek häm solıx kitermäyäçägen söyli. Anıñ fikerençä, Soğud Ğaräbstanınıñ milli neft’ şirkäte Aramkoğa oyıştırılğan höcümdä İrannı ğayepläwçe AQŞnıñ regionda başqa maqsatları bar. Ruxani höcümneñ AQŞ, İzrail, Soğud Ğaräbstanı häm Berläşkän Ğaräp Ämirlekläreneñ Yämändäge qatışularınıñ ber näticäse buluın häm bu ilgä höcüm itmäsälär, qarşı yaqnıñ da alarğa cawap birmäyäçägen belderde.  

“Ber atnada tözätelergä mömkin bulğan zararnı ber ayda tözätä almayaçaqların söyläp propaganda yasıylar. Monıñ säbäbe AQŞnıñ regionnı tulısınça qulına alırğa teläwe. Xäzer hawa saqlanu sistemasın kiterergä uylawların äytälär. AQŞ Soğud Ğaräbstanınıñ könçığışındağı neft’ne tuluısınça üzeneke itärgä isäpli. Älbättä, bu ğawğa bezneñ belän bäyle tügel, AQŞnıñ Qıtay häm başqalar belän ğawğası häm bu forsatnı naçar niyättä qullanalar,”-di İran ilbaşı.  

Ruxani AQŞnıñ İran delegaśyäläreneñ BMOğa kilülären, reportaj birülären häm törle platformalarda urın aluların telämäwen dä äytep uzdı.