AQŞnıñ ilbaşı namzäte UFOlar turında barısın cöylärgä ışandıra
Vermont senatorı Berni Sanders, ilbaşı bularaq saylanğan oçraqta, çit planeta wäkilläre turında däwlät serlären saqlamasqa uylıy
AQŞta 2020nçe yılda uzaçaq ilbaşı saylawlarında namzät bulğan Vermont senatorı Berni Sanders UFOlar (bilgesez oça torğan ob’yekt) belän bäyle härtörle mäğ’lümatnı cämäğat’çelek belän urtaqlaşaçağın belderde. Döres, ilbaşı bularaq saylanğan oçraqta.
Foks N’yus xäbärenä qarağanda, Sanders AQŞta tapşıruların êfirğa birüçe ber podkast programmasında qatnaşqan. Anda ul xatınınıñ üzennän senator bularaq UFOlar turında niqadär mäğ’lümatqa iyä bula aluın sorawın äytä. Sanders isä, moña cawap itep, ilbaşı bularaq saylansa çit planeta wäkilläre turında däwlätneñ qulındağı barlıq mäğ’lümatnı cämäğat’çelek belän urtaqlaşırğa süz birgän.
AQŞ ilbaşı Donal’d Tramp iyün’ ayında ber tapşıruda xärbi pilotlarnıñ sonğı waqıtlarda xäräkät itüçe qayber kük cisemnären kürüen häm monıñ turında üzenä mäğ’lümat citkerelüen, ämma UFOlarğa ışanmawın söylägän ide.
N’yu York Taymsta may ayında çıqqan xäbärdä yazılğança, AQŞ flotında xezmät itüçe qayber pilotlar 2014nçe häm 2015nçe yıllarda ilneñ könçığışında bilgesez oçuçı cisemnär kürüen söyli.
AQŞta 2016nçı yılda ilbaşı känäfiye öçen yarışqan Xillari Klinton da N’yu Xempşirdağı ber gazetqa birgän interv’yusında çit planeta wäkilläreneñ Cirgä küp tapqırlar kilep kitkän bulu mömkinlegen belderde häm UFO mäs’älälseneñ nigezen öyränäçägen äytte.
