Cammu Käşmirdä 500 keşe saq astında

Hindstanda Cammu Käşmir töbäge belän bäyle üzgäreşlärdän soñ kiyerenkelek däwam itä. Çualışlarda 1 keşeneñ ğomere özelde, 500 e saq astına alındı.

İlneñ matbuğat çaralarında urın alğan xäbärlärgä qarağanda, Hindstannıñ Cammu Käşmirne ikegä bülü häm maxsus statusın beterü qararınnan soñ regionda kiyerenkelek arttı. Poliśiyädän qaçuçı ber rizasızlıq kürsätüçe yılğağa sikerep hälaq bulğan.

Töbäktä qanqoyğıç waqıyğalarğa çik quyu öçen soñğı berniçä köndä kimendä 500 keşene iminlek köçläre saq astına alğan. Alarnıñ kübese säyäsätçe häm aktivist.

Hind matbuğatında Cammu Käşmirneñ Radjuri rayonında Hindstan häm Paqıstan xärbiläreneñ ber-bersenä ut açuı turında yazıla.

Hindstan xökümäte räise Narendra Modinıñ bügen xalıqqa möräcäğat’ itep Cammu Käşmir mäs’äläse turında çığış yasawı kötelä.