Hindstan Käşmirneñ maxsus statusın beterergä teli
Bu turıda täq'dim parlamentqa kertelde
Hindstanda xökümät Cammu Käşmir töbägeneñ başqa cirleklärdän tağın da kübräk avtonomiyä birüçe maxsus statusın beterü öçen parlamentqa möräcäğat’ itte.
BBC xäbärenä qarağanda, täq’dimne Hindstan êçke êşlär ministrı Amit Şax yasıy. Oppoziśiyädäge xalıq ışanıçlıları anı rizasızlıq belän qarşılıy.
Şul uq waqıtta, Cammu Käşmirgä soñğı könnärdä xärbi köçlär cibärelde. Cirlektäge säyäsätçelär öy totqınlığına alındı. İminlek köçläre Şrinagarda yullarğa häm çatlarğa timer kirtälär häm çäneçkele çıbıqlar suzdı.
Töbäktä, monnan tış, xalıqqa açıq cıyılışlar tıyıldı, mäktäplär yabıldı, mobil’ çeltärlärgä häm internetqa çikläw kertelde.
Käşmirneñ 45%ı Hindstannıñ, 35%ı Paqıstannıñ kontrolendä, 20%ında Qıtay xakimlek itä.
Hindstan üz qulı astındağı öleşne Cammu Käşmir dip atadı. Ul xäzerge waqıtta Hindstanda möselmannar küpläp yäşäwçe berdänber töbäk.
Paqıstan üz kontrolendäge Käşmirne “Azat Käşmir” häm “Gilgit Baltistan” digän ike avtonomiyäle töbäkkä ayırdı.
BMO iminlek şurası 1948nçe yılda çığarılğan qararda Käşmirneñ xärbilärdän çistartıluın häm kiläçägeneñ referendum belän bilgelänüen qanunlaştırdı.
Hindstan referendumğa cılı qaramıy, Paqıstan isä BMO iminlek şurası qararlarınıñ cirenä citkerelüen teli.
