İzrail köçläre fälästinlelärne qulğa alğan

İzrail ğaskärläre basıp alınğan Yordannıñ könbatış üzänlegendä 19 fälästinlene qulğa alğan.

İzrail armiyäse alarnıñ terror waqıyğalarında qatnaşuların alğa sörgän.

Älege fälästinlelär töbäktäge qulğa alu üzägenä cibärelgän.

Basıp alınğan Yordannıñ könbatış üzänlege häm Könçığış Qudüstä öylärdä bik yış tentü ütkärgän İzrail köçläre  törle däğ’walar belän fälästinlelärne qulğa ala.

Yordannıñ könbatış üzänlege häm Könçığış Qudüstä ğadäti xälgä äwerelgän qulğa alularda aralarında xatın-qızlar häm balalar da bulğan fälästinlelärneñ qayberläre könnär buyı qulğa alu üzäklärendä totıla.

Fälästin räsmi çığanaqlarına kürä ,İzrail törmälärendä yaqınça 5700  fälästinle utıra, alarnıñ  500 gä yaqını administrativ saq astında, 230 ın balalar täşkil itä.

İzrail “administrativ saq astına alu” iseme astında küzläw oyışması mäğ’lümatlarına nigezlänep fälästinlelärne 1 aydan alıp 6 ayğa qadär saq astına ala.

Saq astına alınğan keşeneñ İzrailneñ iminlegenä qurqınıç tudıruı turında qarar çıqqan oçraqta xärbi sud’ya saq astında totu waqıtın 5 yılğa qadär ozınayta ala.

İzrail köçläre Ğazzä kiñleklärendä dä 2 fälästinle balıqçını qulğa alğan häm köymälären konfiskaśiyälägän.

İzrail ğaskärläre çik buyı qağıydälären bozu nigeznamäse belän qayçaq fälästinle balıqçılarğa ut aça ,qulğa ala yaisä köymälären  tartıp ala.  

Ğazzädäge Balıqçılar hönärçelär berlege mäğ’lümatlarına kürä ,töbäktäge 4 meñ balıqçı yaqınça 50 meñ keşeneñ tamağın tuydıra.

İzrail yaqınça 2 million fälästinle yäşägän Ğazzäne 2006 nçı yıldan birle qamaw astında tota.