Rusiyä İranğa ışanıp betä almıy

Mäskäw idaräse Xalıqara atom ênergetikası agentlığınnan İrannıñ uran bayıtu tizlegen häm külämen arttıruı belän bäyle räsmi dokument kötä.  

Rusiyä tışqı êşlär ministrlığınnan yasalğan yazma belderüdä äytelgänçä, iranlı wäkillärneñ atom-töş kileşüendä bilgelängän uran bayıtu däräcäsenä bäyle qalmayaçağı xäbäre qaralğan. Anda bu mäs’älädä Xalıqara atom ênergetikası agentlığınıñ ışanıçlı mäğ’lümatnıñ töp çığanağı buluı da assızıqlana. Şuña kürä, räsmi sannarnı alardan kötälär. “Atom-töş kileşüen, barlıq taraflar da cawaplılıqların cirenä citkergändä, däwam itä aluıbızğa ışanabız,”-diyelä belderüdä.

İran tışqı êşlär ministrı urınbasarı Abbas Arakçi, atom-töş kileşüendä ileneñ ömetläre aqlanmawın säbäp itep, dokument qısalarındağı qayber yöklämälärne ütämäw belän bäyle 60 könlek “İkençe adım” programmasın tormışqa aşıra başlawların beldergän ide.