Meksikada metr yarım qalınlıqta boz yawdı

Meksikanıñ Gvadalaxara şähärendä dawıl çığıp boz yawdı. Uramnar qayber cirdä metr yarım biyeklekkä citüçe körtlär belän qaplandı. Ul boz qıypılçıqlarınnan tora.

BBCneñ xäbärenä qarağanda, boz dawılı, ayıruça, şähärneñ 6 mäxälläsenä köçle täêsir itkän. Xäbärdä hawa cılılığınıñ yaqınça 30 däräcä buluı häm uramnarnıñ boz körtläre belän qaplanuı äytelä. Şähärdä monnan alda da boz dawılları bulğan, ämma bu qadär köçlesen berençe kürüläre.

Gubernator Ênrike Alfaro dawılnı “ışanıp bulmaslıq” dip bäyäläde. “Üzebezdän klimat üzgärüneñ döres bulıp-bulmawın sorıybız. Bolar monnan êlek kürenmägän tabiğıy afätlär,”-dide ul.

Dawılda yaqınça 200 yort häm 50 maşina zarar kürgän. Bäxetkä, ülüçelär yuq.