Avstraliyä xökümäte räisenä yomırqa attılar

Avstraliyä xökümäte räise Skott Morrisonğa Olberi şähärendä 18nçe mayda bulaçaq saylawlar öçen êşçänlek alıp barğanda yomırqa attılar. Ul älege qalada İl xatın-qızlar berlege tarafınnan oyıştırılğan çarada qatnaşa. Jurnalistlar qarşında çığış yasağanda Morrisonnıñ başına 25 yäş’lek ber qız qulındağı yomırqalarnı totıp bärä. Höcümçene xökümät başlığının saqçıları zaldan alıp çığa häm poliśiyägä tapşıra. Anıñ ni öçen yomırqa atuı turında belderü yasalmadı.

Höcüm waqıtında qupqan ığı-zığıda ber olı yäş’täge xatın-qız cirgä yığıla. Morrison aña kütärelergä yärdäm itä häm xälen soraşa. Soñınnan ul sośial’ mediada: “Olberidä bügenge waqıyğada berdänber borçıluım cirgä yığılğan xanım öçen ide. Aña yärdäm ittem häm qoçaqladım,”-dip yazdı.

Töp oppoziśiyä liderı Bill Şorten älege höcümne “qurqınıç häm xurlıqlı ğamäl” bularaq bäyäläde. “Keşelärneñ tınıç rizasızlıq çaralarına röxsät bireler, ämma köç qullanuğa yaqın bernärsä dä qabul itelmäs,”-dide ul.

İl xatın-qızlar berlege xökümät räise Morrisonğa yomırqa atuçınıñ üz äğ’zaları bulmawın belderde.