Notr-Damdağı yanğın

Franśiyäneñ başqalası Parijdağı Notr-Dam soborında kiçä kiç başlanğan yanğın 8 säğat’ yarım barğan tırışlıqlardan soñ sünderelde. Utta 93 metr biyeklegendäge manaralarnıñ berse häm qorılmanıñ tübäse tulısınça zarar kürde.

Qazada 500 yanğın sünderüçe êşläde. Alarnıñ tırışlıqları näticäsendä tön’yaq çañ manarası häm töp bina qotqarıldı.

Parij prokuraturası yanğınnıñ säbäben açıqlaw öçen tikşerü başladı.  

Franśiyädä tarixi äsärlär belän bäyle êşçänlek alıp baruçı Miras waqıfınnan yasalğan belderüdä binanıñ restavraśiyäse öçen ildä yärdäm kampaniyäse başlanacağı äytelde. Franśiyäneñ milliarder Pino ğailäse yañadan tözü êşläre öçen 100 million yevro xäyriyä yasayaçağın xäbär itte.  

Cirle matbuğat çaralarındağı xäbärlärgä qarağanda, sośial’ media platforması Twitterda berniçä säğat’ êçendä yanğın belän bäyle 1 million 600 meñ urtaqlaşu bulğan.

Franśiyä ilbaşı Êmmanuêl’ Makron yanğınnı faciğa dip bäyäläde. “Ğorurlıq xis itik, çönki bu kafedral’ne 800 yıldan artıq waqıt êçendä bez tözedek häm ğasırlar buyı zuraytıp üsterdek. Bu tönne dä qatğıy räweştä belderäm - bergäläp qabat töziyäçäkbez,”-dide ul.

Qazanıñ säbäbe älegä bilgele bulmasa da, yanğın sünderüçelär anıñ 6 million yevrolıq yañartu êşçänlekläre arqasında çığuın farazlıy.

Franśiyäneñ simvolı bularaq kürsätelüçe häm, suğışlarğa qaramastan, ayaqta qalğan 856 yıllıq qorılmanıñ zur külämdä zarar kürüe franśuzlarnı ğına tügel, dön’yadağı bik küp keşene borçuğa saldı.

Notr-Dam kafedralenä nigez 1163nçe yılda salına. Ul ike çirkäwneñ xäräbäläre urınında torğızıla. Binağa bir küp tapqırlar restavraśiyä yasala. Ul, ayıruça, franśuz inqıylabı çorında zarar kürgän bula.

Sena yılğası yarında urnaşqan sobor iñ küp turist kilä torğan urınnarnıñ berse. Anda Mär’yäm Ana häykäle, rozalı täräzälär, küpsanlı sänğat’ äsärläre, zur çañnar häm Urta ğasırlardan qalğan cihazlar bar.

Franśuz yazuçısı Viktor Gyugonıñ 1831nçe yıldan icat itelgän “Parij İlahi anası soborı” äsäre kafedral’ne böten dön’yağa tanıttı.