N'yu-Yorkta fälästinlelärgä teläktäşlek

Ğazzä çigendä ber yıldır här comğa könne uzuçı rizasızlıq çaralarına teläktäşlek yözennän AQŞnıñ N’yu York Tayms mäydanında demonstraśiyä ütte. Anı “Fälästin öçen N’yu-York” koaliśiyäse oyıştırdı.  Şunısı iğ’tibarğa layıq, çarağa törle ictimağıy oyışmalardan tış, xasid yähüdläre dä teläktäşlek kürsätte.

Mäydanda cıyılğan demonstrantlar Fälästin bayraqların häm “Ğazzädäge qamalış betsen”, “Fälästingä bäysezlek”, “Separatist İzrailgä 38 milliard AQŞ yärdäme birelmäsen”  dip yazılğan plakatlar kütärgän.

Çarada qatnaşuçı xasid yähüdläre “İzrailgä qarşı bulu - antisemitizm tügel”, “İzrail däwläte dön’yadağı yähüdlärne wäkillek itmi”, “Dön’yadağı yähüdlär İzrailneñ zalimlığın ğayepli” digän plakatlar tottı.

Qatnaşuçılar soñğı könnärdä antisemitizm bäxäslärendä nişanğa alınğan AQŞ Kongressınıñ täwge yawlıqlı wäkile İlxan Omarğa da teläktäşlek kürsätte.

Çarada çığışlar yasaldı, “Fälästinnän Meksikağa qadär barlıq divarlar cimerelsen”, “Qarşılıq - qanunlı”, Netan’yaxu tawışıbıznı işet, kilüçe fälästinlelärneñ ayaq tawışı” şiğar’läre äytelde.

N’yu York şurası Bruklin rayonı äğ’zası Kalman Yegernıñ Twitterda yazğan “Fälästin digän urın yuq” yazuı AQŞta sośial’ media qullanuçıları arasında zur rizasızlıq uyattı.

Fälästinlelär 2018nçe yılnıñ 30nçı martınnan birle qamalıştağı Ğazzäneñ İzrail çigendä “Böyek qaytu yöreşe” iseme astında tınıç çaralar uzdıra. Alar quılğan cirlärenä kire qaytu häm 2006nçı yıldan birle Ğazzädä bulğan xoquqsız qamalışnı beterüne taläp itä.  İzrail xärbiläre isä ğadi xalıqqa çın yädrälär belän ata.  

Ğazzädäge sälamätlek saqlaw ministrlığı mäğ’lümatlarına qarağanda, İzrail uzğan yılnıñ 30nçı martınnan birle däwam itüçe tınıç çaralarda 230dan artıq fälästinlene üterde.