İtaliyädä faciğä bula yazdı

İtaliyäneñ tön’yağında ber mäktäp avtobusınıñ şofyerı 51 uquçını urlap yandırırğa mataştı. Cirle matbuğat çaralarındağı xäbärlärgä qarağanda, böten waqıyğa 40 minut êşendä bula. Balalar sportzalğa baru öçen mäktäp avtobusına utıra. 47 yäş’lek Usseynu Si isemle yörtüçe isä, marşrutnı üzgärtep, alarnı Milan Linate aêroportına taba alıp kitä.

Avtobustağı balalarnıñ añlatuına qarağanda, şofyer ber urında tuqtap uquçılarnıñ qulların bäylägän häm öslärenä benzin sipkän. Berse qulların çişä alğan häm poliśiyägä şaltıratqan.

İminlek saqçıları avtobusnı barrikadalar yasap tuqtata. Yörtüçe avtobustan çıqqanda çaqmağın atıp maşinağa ut törtä. Ämma texnikanı ut çolğap alğanğa qadär poliśiyä balalarnı qotqarırğa ölgerä. Avtobus yörtüçene qulğa alalar. Ul Senegal çığışlı İtaliyä watandaşı häm, balalarnı yandırıp, Urta diñgezdäge qaçaq ülemnärenä rizasızlıq kürsätergä telägän.