Yaña Zelandiyädäge höcümne yasawçı 2 yıl äzerlängän

Yaña Zelandiyädä ike mäçetkä qorallı höcüm oyıştıruçılardan berse Brenton Tarrantnıñ Avstraliyä keşese buluı açıqlandı. Terrorçınıñ 5 yarımavtomat mıltıq qullanıp atu mizgelläre sośial’ mediadan turıdan-turı êfirda kürsätelde. Annan kürengänçä, höcüm komp’yuter uyınnarına oxşatıp başqarıla. Terrorçı mäçetneñ işegennän kerer-kermäs ata başlıy. Anıñ waqıyğa barışında yädrälärne berniçä tapqır yañartuı küzgä taşlana. Mıltıqlarnıñ östenä monnan alda dön’yanıñ başqa cirlärendä möselmannarğa höcüm oyıştıruçılarnıñ isemnäre yazılğan.

Terrorçını, maşinası belän qaçqanda, Yaña Zelandiyä poliśiyäse êläkterde. Anıñ älege höcümne 2 yıl buyı planlaştıruı, qanlı waqıyğadan alda Twitter xisabınnan manifest belän urtaqlaşuı bilgele buldı. Ul anda 2011nçe yılda Norvegiyädä 77 keşene ütergän Anders Breyviktan ilham aluın yazğan.  

Twitter Brenton Tarrantnıñ xisabın tuñdırdı. Feysbuk ta höcümçeneñ xisabın êzläw näticäläre bülemennän çığardı.