AQŞ "Boing 737 Maks"larnı oçışlardan aldı
Tramp bu qararnıñ bik awırlıq belän alınuın sizderde
Amerika Quşma Ştatları däwlät başlığı Donal’d Tramp ildäge barlıq Boing 737 Maks 8 häm Maks 9 törendäge oçqıçlarnıñ säfärlären tuqtatu turında belderde. Bu xaqta ul Aq Yortta jurnalistlarğa xäbär itte. Tramp älege qararnıñ AQŞ aviaśiyä idaräse tarafınnan kiçekmästän tormışqa aşırılacağın da äytte.
“Bu mäs’äläne üz ağımına qaldırırğa telämädem. Kiräklesen êşläwebezne uylıym. Amerika xalqı häm barlıq keşelärneñ iminlege iñ ähämiyätleseder. Boing tiz arada cawapların xäzerlär dip ömetlänäm, ämma ul waqıtqa qadär oçqıçları cirdä toraçaq,”-dide ul.
Donal’d Tramp, monnan tış, Boingnıñ bik däräcäle firma buluın häm oçqıçların cirdä totu qararınıñ alar öçen bik awır borılış noqtası ikänen añlawın da äytte.
Êfiopiyä hawa yullarınıñ Boing 737 Maks 8 törendäge oçqıçı 10nçı martta 157 keşe belän kükkä kütärelep beraz waqıt uzğannan soñ qazağa oçradı. Berkem dä isän qalmadı.
Şunnan soñ Törkiyä, Singapur, Qıtay, Êfiopiyä, İndoneziya, Avstraliyä, Malayziyä, Omman, Angliyä, Awrupa Berlege häm tağın distälägän il Boing 737 Maks oçqıçlarınıñ säfärlären tuqtattı häm hawa mäydannarın bu oçqıçlar öçen yaptı.
