Gumanitar yärdämne kemneñ yandıruı açıqlandı

Uzğan ayda Kolumbiyädän Venesuêlağa kertergä mataşqanda çik buyında yanğan gumanitar yärdäm konvoylarına däwlät başlığı Nikolas Maduroğa bäyle köçlär ut törtmäwe bilgele buldı. “N’yu-York Tayms” gazetı êlegräk kürsätelmägän yaña videolar tabıp, alarnı centekläp analizladı. Alar oppoziśiyä häm AQŞ wäkilläreneñ “Çiktäge gumanitar yärdäm konvoyları Maduro ämere belän yandırıldı” digän süzläreneñ döreslekkä turı kilmäwen açıqladı. Videolardan kürengänçä, yanğın Maduroğa rizasızlıq belderüçelär atqan molotov kokteyl’läre arqasında başlanıp kitkän.    

Waqıyğa könne Kolumbiyä xökümäte iminlek kameraları töşerep alğan videolar belän urtaqlaştı. Ämma alar yalqın yök maşinaların çolğap alğanğa qadärge 13 minutlıq öleşne kiskän. Monnan tış, “N’yu-York Tayms” yazğança, yanğan yök maşinalarına, AQŞnıñ äytüe şikelle, xastaxanälärgä iltelüçe darular töyälmägän, barı bitleklär häm perçatkalar kebek gigiyena kiräk-yaraqları tutırılğan bula.  

Venesuêla oppoziśiyäsen yaqlawçı Kolumbiyä xökümäte çiktä yanğan yök maşinaları waqıyğasında Maduro idaräsen ğayeplägän ide. Alay ğına tügel, AQŞ däwlät başlığı Donal’d Trampnıñ kiñäşçese Mayk Pens, milli qurqınıçsızlıq kiñäşçese Djon Bolton häm Florida cömhüriyätçe senatorı Marko Rubiodan başlap bik küp räsmi zat ta Maduro östenä ğayepläwlär yawdırdı.

Çik buyındağı xällärdän soñ Nikolas Maduro yök maşinalarınıñ yalğan operaśiyä belän yandırıluın belderep, Kolumbiyä däwlät başlığı İvan Duke Markesnı tänqıyt’läde häm älege il belän mönäsäbätlärne çikläwen belderde.