Mäyet êçendä bomba
Malida ber awıl keşeseneñ cäsädenä urnaştırılğan şartlatqıç küp keşeneñ ülemenä kiterde
Malinıñ Koro şähärendä ber mäyetkä urnaştırılğan bombanıñ şartlawı näticäsendä 17 keşeneñ ğomere özelde, 15e yaralandı.
Cirle matbuğat çaralarındağı xäbärlärgä qarağanda, Koro şähäre yanındağı awılda terleklärne êzläw öçen çığıp kitkän beräw yuq bula. Ğailäse säğat’lär ütkännän soñ anıñ mäyeten tabıp ala. Cäsädneñ êçenä bomba quyılğan bula. Ul märxümneñ ğailäse häm yaqınnarı yanında şartlıy.
Oxşaş waqıyğa atna axırında Malinıñ kürşesendäge Burkina-Fasoda bulğan ide. Anda mäyet êçenä quyılğan bomba şartlap ike xärbi ülde, 6sı yaralandı.
Malinıñ tön’yaq häm üzäk öleşlärendä 2012nçe yıldan birle separatist bäreleşlär häm terrorçılıq höcümnäre bulıp tora.
Franśiyäneñ “Barkxanä operaśiyäse” iseme astında xezmät itüçe 4 meñ xärbiye dä, BMO citäkçelegendä qorılğan 15 meñ keşelek tınıçlıq köçe dä älegä yanawnı beterä almadı.
