Avstraliyädä migrantlarğa qarata qırıs qararlar

Avstriyädä çiktän tış uñçı xökümät möhacirlärgä qarşı uramğa çığunı tıyu häm qurqınıçsızlıq izolyatorı şikelle qırıs adımnarnı tormışqa aşırırğa cıyına. Bu xaqta êçke êşlär ministrı Gerbert Kikl matbuğat kiñäşmäsendä belderde. Anıñ äytüençä, 1nçe martqa qadär sıyınu turında ğariza yazğan, ämma älegä migrant statusı almağan keşelär toruçı maxsus yortlarda bilgele säğat’lär arasında uramğa çığu tıyılaçaq. Alar kiçke säğat’ 10nan irtänge 6ğa qadär üzläre torğan üzäklärdä bulırğa tiyeş. Kikl bu şartnın mäcbüri bulmawın, anı tormışqa aşıru iniśiativası yortlarnıñ ixtiyarına birelüen dä äytte.

Ministr, monnan tış, “potenśial’ qurqınıç sıyınuçılar”ğa qarşı “iminlek izolyaśiyäse” dä ğamälgä kerteläçägen belderde. Ul älege şartnıñ Awrupa Berlege qanunnarına qarşı kilmäwen alğa sörde.

Kikl bu ısullar belän kiläçäktä Avstriyägä sıyınırğa teläwçelärgä kirtä tudıraçağına şiklänmi.  

Çiktän tış uñçı xökümätneñ iminlek izolyaśiyäsen ğamälgä kertüe öçen parlamentta küpçelek tawışnı cıyuı kiräk. Uramğa çığunı tıyu ixtiyari buluı öçen - anı tawışqa quyu kiräkmi.  

İlbaşı Aleksandr Van der Bellen iminlek izolyaśiyäse programmasınıñ xoquqıy yaqtan problemalı buluına iğ’tibarnı cälep itte. “Bu programma ireklärne qısu şikelle bik naçar ber küreneşkä kiterergä mömkin. Älege mäs’älädä bik kisätüçän bulırğa kiräk,”-dide ul.

Törle ictimağıy oyışmalar êçke êşlär ministrlığınıñ täq’dimnäreneñ faşistlar çorındağı şartlarğa oxşaş buluına basım yasap, çiktän tış uñçı xökümätkä rizasızlıq belderde.