Ber öydä 193 keşene bikläp totqannar

İndoneziyäneñ Sumatra utrawında ber öydä bikle totılğan 193 keşene qotqardılar. Medan şähärendä êş cire häm toraq yort bularaq qullanıluçı binada totqınnar buluı poliśiyä basqını waqıtında açıqlana.

Qotqarıluçılarnıñ barısı da möhacir ir-at, kübese 20 yäş’lärendä. Bu keşelärneñ Bangladeştan kilüe açıqlandı. Alar ilgä turist bularaq kergän häm qaçaq yullar belän Malayziyägä êş êzlärgä barırğa cıyınğan. Soraw alu barışında açıqlanğança, qayberläre yaqınça 4 aydır bikle öydä yäşägän. Alarnı susız häm aç kileş totqannar.

193 bangladeşlı qaçaqnı migrantlar saq astı üzägenä ilttelär. Alarnı räsmi dokumentları äzerlängännän son illärenä qaytarıp cibäräçäklär.