Alek Bolduin az aşarğa quştı

Amerikanıñ tanığan aktyerı Alek Bolduin dön’yanı qotqaru öçen it aşawnı kimetergä çaqırdı. Ul xatını Xilaria Bolduin belän BMOnıñ ğomum üzägendä “Azıq-tölek, planeta häm sälamätlek” temasına äzerlängän xisapnı tanıtuda qatnaştı.

Aktyer azıq-tölek citeşterüneñ êkologiyä problemalarınıñ üzägendä buluına iğ’tibarnı cälep itte. Ul tuqlanu ğadätlären üzgärtü häm qızıl itne az qullanunıñ êkologiyägä naçar yoğıntılar belän köräşkä öleş kertäçägen söyläde.  

Xisapta azıq-tölek citeşterü - êkologiyä bozıluğa kiterüçe iñ zur säbäplärneñ berse bularaq kürsätelä.  Anda äytelgänçä, tuqlanu häm azıq-tölek citeşterüdä radikal’ üzgäreşlär kiräk. İt häm şikärne dön’yaküläm qullanunı 2050nçe yılğa qadär 50%qa kimetü, ciläk-cimeş, yäşelçä, çikläwek häm quzaqlılarnı aşawnı isä 2 tapqır arttıru möhim.  

Xisapta yazılğança, här ütkän kön sayın dön’yada artqan keşelärneñ tuqlanu ixtıyacına cawap birü öçen azıq-tölek citeştergändä planetanıñ êkologik balansın küzdä totu ähämiyätle.