Soğud Ğaräbstanında ayırılışuçılar öçen yañalıq

Soğud Ğaräbstanında xatın-qızlar xäzer irennän ayırıluın minutında belä alaçaq. Alarğa bu xaqta kesä telefonnarına qısqa xäbär kilä başlıy. Älege yañalıq täxet prinśı Möxämmät bin Sälman başlağan reformalar qısalarında tormışqa aşırıla.

Bilgele bulğança, Soğud Ğaräbstanında irlär xatınnarına xäbär itmiçä dä ayırıla ala. Xatınnarınıñ ozaq waqıt bu xaqta belmiçä yäşäwe dä yış bulğalağan. Xäzer isä mäxkämä qararı çığuğa uq xatın-qızğa xäbär kilä.  

Yaña qanun xatınnarnıñ alimentqa xoquqların saqlaw häm bank xisaplarınıñ êlekkege irläre tarafınnan qullanıluın kirtäläwne maqsat itep quya.

Soğud Ğaräbstanında uzğan yıl xatın-qızlarğa maşina yörtü xoquqı birelde. İldä güzäl zatlar xäzer futbol matçların stadionda qarıy häm êlek ir-atlar ğına êşlägän urınnarda xezmät itä ala.

Ämma soğudlı xatın-qızlar ir-at wäkilennän - başlıça, ire, ätise, ir tuğanı yäisä ulınnan - başqa passport alu öçen ğariza birä, çit ilgä çığa, banka xisabı aça almıy. Şulay uq, üz êşen dä yalğız başına açarğa röxsät itelmi.