Çikertkälärneñ “tawış höcüme”

AQŞ 2016nçı-2017nçe yıllar arasında Kubada xezmät itkän diplomatlarına Gavana idaräse tarafınnan “tawış höcüme” yasaluın beldergän ide. Yänäse, älege höcüm näticäsendä 24 Amerika watandaşı çukraqlanğan häm sälamätlegenä başqa zararlar kilgän. Belgeçlär, şul waqıtta yazdırıp alınğan şöbhäle tawışlarnı tikşergännän soñ, alarnıñ çikertkäneke buluın açıqladı.

Tawışlarnı Kaliforniyä universitetınnan Aleksandr Stabbs häm Angliyäneñ Linkol’n universitetı wäkile Fernando Montalegre analizladı. İke ğalim dä anıñ hiçşiksez çikertkäneke buluın raslıy.

Aleksandr Stabbs bu xaqta interv’yusında söyläde. “Tabiblar arasında beräwlärdä barlıqqa kilgän fizik zarar turında bäxäslär küp buldı. Ämma şunı tögäl äytä alam - yazdırıp alınğan tawışlar çikertkäneke häm anıñ qaysı töreneke ikänen dä beläbez,”-dide ul.

Stabbs tawışlarnı işetügä Kariblardağı fänni êşçänlegen xäterlägän. İşetelgän köçle vibraśiyä häm yuğarı yışlıqlar andağı böcäklär çığarğan tawışlarğa bik oxşağan bula. Ata çikertkäneñ ana ceneslärne üzenä qaratu öçen cırlawı - moña ürnäk.  

Ämma ğalimnär bu çınbarlıqnıñ AQŞ diplomatlarına höcüm yasalmawı turında söylämäwen dä östäde.   

Amerika Quşma Ştatlarınıñ Gavanadağı ilçelegendä 2016nçı yılnıñ noyabrennän birle 24 keşedä “tawış höcüme” belän bäyle buluı farazlanuçı çuqraqlanu, küz kürüe naçarlanu häm kognitiv problemalar barlıqqa kilgän.

Kuba tışqı êşlär ministrı Bruno Rodrigez AQŞ diplomatlarına yäşeren höcümnärne kire qaqtı.    

Älege waqıyğadan soñ Kubada xezmät itüçe Kanada diplomatlarınıñ da çuqraqlanudan däwalanuı belderelde.