İtaliyä häm Mal'ta qaçaqlarnı alırğa telämi

İspaniyä yärdäm oyışması Open Arms Mal’ta häm İtaliyä xökümätläreneñ Urta dingezdä qotqarılğan 313 qaçaqnı illärenä kertergä telämäwlären xäbär itte. Belderüdä äytelğänçä, migrantlarnı Liviyäneñ Tripoli şähäre tiräsendäge sulıqlarda qotqarğannar. Alarnı iske köymälärennän üzlärenekenä alalar. Qaçaqlarnı urnaştıru öçen oyışma törle yullarnı sınap qarıy. Mal’ta häm İtaliyä xökümäte alarnıñ möçräcäğaten kire qağa.

İtaliyä viśe-prem’yerı häm êçke êşlär ministrı Matteo Salvini, bu mäs’älä turında belderü yasap, ilneñ portlarınıñ qaçaqlar öçen yabıq buluın äytte.

“Open Arms”nıñ İspaniyä bayraqlı köymäse qotqarılğan qaçaqlarnı başta Mal’tada qaldırırğa teläde. Alar yaña tuğan bäbäy belän änisen genä aldılar da, başqalarğa “yuq” didelär. Minem cawabım tögäl - İtaliyä portları yabıq. Keşe qaçaqçıları häm alarğa yärdäm itüçelärgä, äzergä-bäzerlärgä yabıq,”-dide ul.  

“Open Arms”nıñ oyıştıruçılarınnan Oskar Kamps Twitter aşa Salviniğa: “Sineñ bu ğamälläreñ häm süzläreñnän balalarıñ oyalaçaq,”-dip cawap birde.

Şul uq waqıtta, İtaliyä ictimağıy êşlär ministrı Danilo Toninelli dä Twitterda bolay dip yazdı: “Open Arms” waqıyğasına kilgändä, Liviyä sulıqlarındağı yärdämne İtaliyä koordinaśiyälämäde. Şulay uq, Franśiyä, İspaniyä yäisä başqa illär dä. Alaysa, Awrupa Berlege närsä teli? Tärtipsez räweştä qaçaqlar ağıluğa Awrupanıñ tulayımınnan urtaq cawap kiräk.”

Urta dingez arqılı migraśiyä oçraqları bıyıl Awrupa Berlege êçendä bik yış krizisqa kiterde. Soñğı tapqır İtaliyä häm Mal’tada başlanğan, annarı Awrupa Berlegenä cäyelgän tağın ber qaçaq kiyerenkelege iyün’dä buldı. 629 migrantnı alğan Aquarius dip ataluçı korab ällä niçä kön Urta dingezdä kötterelde. Kiyerenkelekne İspaniyä beterde. Köymäne ul waqıtta ilneñ Valensiyä portı qabul itte.