Xökümät räisenä yomırqa attılar

Albaniyädä parlament utırışında prem’yer-ministr Êdi Ramağa töp oppoziśiyä firqase - Demokratik partiyädän ber deputat yomırqa attı. Älege xäl xökümät räise tribunada çığış yasağan waqıtta buldı. Yomırqa belän höcümne xalıq ışanıçlısı Êndri Xasa başqardı. Şunnan soñ parlamenttağı saq xezmäte Ramanı çolğap aldı häm anıñ qurqınıçsızlığın täêmin itte. Parlament räise Gramoz Ruçi kiyerenke minutlarda utırıştağılarnı tänäfeskä çığardı. Deputat Hasanı qanun çığaru êşennän 10 köngä çitläşterde.

Utırışta sentyabr’dä başlanğan parlament êşçänlegen boykot itüçe oppoziśiyä firqaläre - Demokratik partiyä häm  Albaniyä sośialistik bötenläşü xäräkäte wäkilläre dä qatnaştı.  

Parlamentta Albaniyä cömhüriyäte belän Eurojust (Awrupa Berlege illäre arasında xökem çığaru xezmättäşlegen kontrol’dä totuçı oyışma) arasında xezmättäşlek kileşüeneñ xuplanuın küzallağan qanun proyektı tışında qayber başqa dokumentlarnı qaradılar.