Parij qabat utta

Parij uramnarınıñ qabat astı öskä kilde. Franśiyädä sıyıq yağulıqqa bäyä artuğa rizasızlıq belän başlanğan, soñınnan ilbaşı Êmmanuêl’ Makron häm anıñ idaräsenä qarata näfrätkä äwerelgän çaralar däwam itä.

“Sarı jiletlılar” taşqını,  xökümätneñ sıyıq yağulıqqa bäyä kütärü qararın ğamäldä çığaruına qaramastan, uramnarnı tutırdı. Alar Makron idaräseneñ säyäsi häm iq’tisadi säyäsätenä qarşı çığa.

Çarada qatnaşuçılar kiçä cirle waqıt belän irtänge säğat’ 7dä Parij simvolı bulğan Şanzêlize uramı yanında cıyıla başladı. Poliśiyä alarnı uramğa tikşerep kertte. “Makron kitsen” dip qıçqıruçı rizasızlar belän polśiyä arasında qaywaqıt kiyerenke mizgellär bulıp aldı. “Sarı jiletlılar” töşke säğat’lärdä, iminlek xezmätkärläreneñ kisätülärenä qaramastan, yaqındağı başqa uramnarğa kerde. Anda maşinalarğa ut törttelär, poliśiyägä taş häm şeşä attılar. Wäzğıyät’ kiskenläşügä waqıyğa urınnarına bronyalı poliśiyä texnikası kiterelde. Repablik häm Opera şikelle törle noqtalarda ütüce çaralar waqıtında kibetlär basıldı häm tirä-yün’gä zarar salındı.

İlneñ küp şähärlärendä yullarnı yaptılar. Şanzêlizedä muzeylar êşlämäde, kibet häm restorannar yozaqqa biklände. Garn’ye häm Bastill Opera binalarındağı programmalar ğamäldän çığarıldı. 30dan artıq metro tuqtalışı xezmät kürsätmäde.

Çaralar xätta sportqa da yoğıntı yasadı. Franśiyäneñ 1nçe futbol ligasında irtägä Parijda ütärgä tiyeş matç kiçekterelde.

Franśiyä êçke êşlär ministrı Kristof Kastaner beldergänçä, il külämendä älege çaralarda 125 meñ keşe qatnaşqan, 974se saq astına alınğan. Şulay uq, 118 keşeneñ yaralanuın da äytälär.