Franśiyädäge çaralar küpmegä töşte

Franśiyä iq’tisad ministrı Bruno Le Mêr il külämendäge rizasızlıq çaralarınıñ iq’tisadqa köçle täêsir itüen belderde.  Xalıq 17nçe noyabr’dän birle yağulıqqa bäyälär artuğa qarşı demonstraśiyälär oyıştıra.  Ministr matbuğat cıyılışında beldergänçä, çaralar säbäple şirkätlärneñ äyläneştän yuğaltuları 10 kön êçendä 60-70%. İsemlektä it satuçı, ikmäk peşerüçe häm çäçtaraşxanälär bar.

Le Mêr êşmäkärlär tağın da kübräk zarar kürmäsen öçen qayber kisätü çaraları qullanaçaqların äytte.

10 könder xökümätneñ sıyıq yağulıqqa östämä salım kertü qararına rizasızlıq kürsätüçe häm “sarı jiletlılar” dip ataluçı törkem başta başqala Parijda häm başqa bik küp şähärlärdä uramğa çıqtı. Alar danlıqlı Şanzêlize uramnarında tirä-yün’gä zarar birde häm poliśiyä belän qarşılıqqa kerde.  Çarada qatnaşuçılar iminlek xezmätkärlärenä şeşä häm trotuar taşların qubarıp attı. Berniçä urında ut törttelär.

Franśiyä êçke êşlär ministrı Kristof Kastaner il külämendä oyıştırılğan 1600läp çarada yaqınça 106 meñ keşeneñ qatnaşuın belderde.