İtaliyädä dawıl

İtaliyädä dawıl näticäsendä barlıqqa kilgän su basuda häm köçle cil arqasında ağaçlarnıñ yığıluı näticäsendä 9 keşeneñ ğomere özelde. Ülüçelär arasında êzläw-qotqaru êşlärendä qatnaşqan yanğın sünderüçe dä bar. İlneñ kön’yaq-könbatışındağı Kalabriya töbägendä yuğalğan keşeneñ isä törek internet säxifäse citakçese buluın belderälär. Anıñ cilkänle köymäse dawılğa êläkkän. Yuğaluçınıñ kemlege açıqlanmadı.

Dawıl waqıtında törle şähärlärdä bik küp keşe yaralanğan.

Naçar hawa şartları säbäple Rimda häm tön’yaqtağı şaqtıy şähärdä uqular tuqtatılğan.

Veneśiyä dä dawıl yoğıntısında qaldı. Şähärneñ cir östendäge öleşeneñ 75%ın su bastı.

Yanğın sünderüçelär il buyınça 5 meñnän artıq qotqaru operaśiyäse tormışqa aşırdı.

Cilneñ tizlege iñ yuğarı däräcägä citkän urın Liguriya töbäge buldı. Anda ul säğatenä 180 kilometr tizlek belän isä.

Liguriyadağı Rapallo şähäre portında bik küp yaxta dawıl waqıtında pirsqa bärelep, anıñ östenä işelde. Köymälärneñ berse ilneñ êlekkege xökümät räise Sil’vio Berluskoni ğailäseneke.