Rassel Krou Avstraliyä häm Yaña Zelandiyäne berläşterü yaqlı

Yaña Zelandiyädä tuğan Gollivud yoldızı Rassel Krou Avstraliyä häm Yaña Zelandiyäneñ berläşü waqıtı citüen belderde. Ul avstraliyäle jurnalist Jonatan Grinnıñ Twitterdağı yazmasına teläktäşlek kürsätte. Grin Yaña Zelandiyä xökümäte räise Xasinda Ardernnıñ uzğan atnada BMOnıñ Ğomum şurasında yasağan çığışı belän urtaqlaştı. Jurnalist Avstraliyä xökümäte başında Ardernnıñ toruın teli. Bu mäşhür aktyer Rassel Krounıñ iğ’tibarın cälep itkän. Ul jurnalistnıñ Twitterdağı yazmasına cawap itep: “Tıñla häm qabul it kenä. Ul (Xasinda Ardern) iskitkeç keşe. Avstraliyä häm Yaña Zelandiyäne berläşterep Ardernnı xökümät räise itüneñ waqıtı citmädeme? Bäxäsläşü açarğa telämim, barı ğamäli bulırğa tırışam,”-dide. Krounıñ bu çaqıruına sośial’ mediyada bik küp cawap kilde. Yaña Zelandiyä häm Avstraliyä räsmi dairäläre älegä däşmi.    

Yaña Zelandiyä xökümäte räise Xasinda Ardern uzğan atna N’yu-Yorkta uzğan BMO Ğomum şurasınıñ 73nçe utırışına 3 aylıq qızı Neve belän kilep iğ’tibarnı cälep itte. Ul räsmi oçraşular tışında, AQŞtağı televideniye kanalları tapşırularında qatnaşıp ilen tanıtırğa tırıştı.

38 yäş’lek Xasinda Ardern 2017nçe yılnıñ 26nçı oktyabrendä xakimiyätkä kilde. Ul Yaña Zelandiyäneñ 40nçı prem’yer-ministrı. Wazıyfasına kereşep 8 ay ütkäç Ardern bala taptı häm 6 atnalıq yal aldı. Avgust ayı başında ul qabat êşli başladı.