AQŞta ğarasat ülemnärgä kiterde

Amerika Quşma Ştatlarında xakimlek itüçe Florenśiyä ğarasatında 4 keşeneñ ğomere özelde, alarnıñ berse keçkenä bala. Ğarasat kiçä irtän kontinentqa kilep citte. Anıñ täêsire, ayıruça, Tön’yaq Karolinada sizelä. Ştatnıñ  Uilmington rayonı iminlek xezmätennän belderülärençä, ağaç öyläreneñ östenä töşü säbäple ber narasıy belän äniseneñ ğomere özelä. Yaralanğan äti keşene xastaxanägä ozatalar.

Xêmpsted şähärendä isä ber xatın-qız yöräk öyänägennän ülä. Yığılğan ağaçlar yullarnı qaplaw säbäple tabiblar aña yärdämgä barıp citä almıy.  

Lenuar qalasında ber ir-atnı generatornı êşlätergä mataşqanda tok bärep üterä.  

Räsmi mäğ’lümatlarğa qarağanda, Tön’yaq Karolina yarlarında dulqınnarnıñ biyeklege 3 metrğa citä.

Ğarasat säbäple, Kön’yaq häm Tön’yaq Karolinada 620 meñ keşe utsız qalğan.

Belgeçlär ğarasatnıñ kategoriyäse 1gä töşügä qaramastan, täêsireneñ ülemçel buluı turında kisätä.

AQŞnıñ könçığış yarında yäşäwçe 1 million 700 meñ keşene êvakuaśiyäläw qararı çığarıldı.