Yämändä balalarnı taşuçı avtobusqa höcüm
Anda distälärçä ğomer özelüen xäbär itälär
Yämänneñ tön’yağındağı Sada rayonında balalarnı taşuçı avtobusqa höcüm buldı. Anda distälärçä ğomer özelüen xäbär itälär. Bu xaqta Xalıqara Qızıl Xaç komitetı Twitter aşa belderde. Waqıyğa Dahyan şähärendäge bazarda bulğan. Höcümnän soñ Qızıl Xaç yärdämendäge xastaxanägä küpsanlı yaralı häm ülelärne kitergännär. Oyışma xalıqara keşe xoquqları qanunnarı nigezendä bäreleş bulğan ölkälärdä ğadi xalıqnın iminlegen saqlarğa çaqırdı. Belderüdä höcümne niçek häm kemnär yasawı äytelmi.
Xusilär bu höcümneñ Soğud Ğaräbstanı citäkçelegendäge koaliśiyä köçläre cawaplılığında buluın belderde. Süzçe Möxämmät Abdussälam: “Soğud Ğaräbstanı - Amerika Quşma ştatları oçqıçları bu irtän Sada rayonınıñ Dahyan şähärendä uquçılarnı taşığan ber avtobusnı maqsat itep alıp küpläp üterü ğamälgä aşırdı,”-dip söyläde. Ul, şulay uq, distälärçä keşeneñ ülüen dä äytte.
Soğud Ğaräbstanı citäkçelegendäge koaliśiyä köçläre tarafınnan waqıyğa belän bäyle belderü älegä yasalmadı.